Na honor di e 5 aña di eksistensia e programa BES(t) 4 kids ta publiká e revista ‘The best of BES(t) 4 kids’. Den e revista aki por tira un bista bèk riba 5 aña trahando huntu na mehorashon di akohida di mucha na Hulanda Karibense. E revista ta kontené entrevista sinsero ku personanan konserní di Boneiru, Saba i Sint Eustatius i Hulanda Oropeo. E pasonan tumá, e desafionan, éksitonan i lèsnan siñá ta bini dilanti.
E Grupo di Direkshon BES(t) 4 kids den kua e diputadonan di e isla ta partisipá, tokante e revista: “Nos ta tuma pasonan grandi i chikitu, kometé eror, pero tambe logra éksito. Nos ta siña hopi, tantu huntu ku otro komo tokante di otro. Den e revista aki, nos ta kompartí storia- i lèsnan for di práktika. Nos ta orguyoso di loke ya nos a logra, i ta wak pa dilanti ku konfiansa”.
Loke ta remarkabel den e entrevista ta kon enbolbí tur e hendenan ku ta kolaborá i yuda traha riba mehorashon konstante di kalidat di akohida di mucha ta: e organisashonnan pa akohida di mucha, profeshonalnan pedagógiko, lidernan di proyekto, i hopi hende mas. Sea ku ta trata di desaroyo di legislashon den kua ta tene kuenta ku e konteksto lokal, organisashon di e supervishon i struktura di kuido, solushon di problemátika di alohamentu òf mehorashon di kalidat, tur hende ta koperá ku rèspèt pa posishon i ekspertisio di un i tur. Tur ta traha huntu sabiendo ku huntu nos por organisá e mihó akohida di mucha. Basá riba e konvikshon ku esaki lo sòru pa mucha felis i sano i mayornan kontentu, i ku esaki tambe pa un futuro den kua kada mucha ta haña chèns pa desaroyá su mes tur ku tin.
E lèsnan siñá ta inkluí den e revista i ta bai tokante e importansia di bishita otro, aseptashon di diferensianan i komprenshon pa otro su ‘background’, posishon i konteksto. Tambe ta atendé kondishonnan importante manera sèn i tempu i e importansia pa selebrá éksito. E grupo di direkshon BES(t) 4 kids ta spera ku e revista aki ta inspirá otro kolaborashon den futuro ku i entre Boneiru, Sint Eustatius, Saba i Reino.