E sekretarionan di Estado Van Ark i Knops durante nan bishita na Saba, Sint Eustatius i Boneiru a firma un plan di vários aña pa reforsá akohida di mucha na Hulanda Karibense. E plan di e programa ta originá for di un koperashon entre e tres Entidatnan Públiko i e Ministerionan di Edukashon, Kultura i Sensia (OCW), Asuntunan Sosial i Asuntunan di Trabou (SZW), Salubridat, Bienestar i Deporte (VWS) i Asuntunan Interno i Relashon di Reino (BZK).
BES(t) 4 Kids, manera ta yama e programa, ta konsistí di un enfoke kordinadó pa Hulanda Karibense i tres plan di enfoke insular. E meta di e partidonan ku ta koperá ta pa realisá akohida di bon kalidat pa mucha, promé ku skol i despues di skol, na Boneiru, Sint Eustatius i Saba. E fókùs ta pa krea un ambiente seif i ku bon kuido pa mucha te ku 12 aña di edat ku ta pagabel pa tur mayor.
E base di e programa ta un areglo legal den kua a inkorporá un forma nobo di finansiamentu i inspekshon. E areglo den desaroyo aki pa kada isla ta tradusí den un dekreto lokal ku ta tene kuenta ku sirkunstanshanan spesífiko pa e isla. Pa por kumpli ku e kondishonnan nobo, e organisashonnan ehekutivo (manera akohida di mucha, akohida despues di skol i skolnan) ta haña sosten di e Entidat Públiko. Ta e intenshon pa Reino finansiá e organisashonnan aki direktamente for di 2022.
Ku e firmamentu di e plan di programa i e introdukshon di e grupo di direkshon, awor e programa ta start ofishalmente. Lo envolví e partnernan sosial i ehekutivo estrechamente den elaborashon i e implementashon mas aleu di e plan. Solamente si tur hende huntu duna un man por logra e resultado deseá