E kontribushon di mayor pa akohida di mucha na Hulanda Karibense lo baha konsiderablemente pa mayoria mayor. Entrante 2022 akohida mester ta aksesibel pa tur mucha. Asina sekretario di estado Tamara van Ark (SZW) i minister Arie Slob (OCW) ta duna di konosé den un karta na Tweede kamer tokante e sistema nobo di finansiamentu pa akohida di mucha na Hulanda Karibense. Den transkurso di e aña akí mayornan ta bai paga ménos kaba pa akohida di mucha. E ora ei un areglo di supsidio temporal ta drenta na vigor.
Gabinete i e entidatnan públiko di Boneiru, Sint Eustatius i Saba aña pasá a hasi palabrashonnan tokante mehorashon di akohida di mucha na Hulanda Karibense. P’esei Gobièrnu Sentral i e islanan a organisá e programa BES(t) 4 Kids. Ku e programa aki ta traha pa mehorá e kalidat di akohida di mucha i pa hasi esaki (finansieramente) aksesibel pa tur mucha. Pa esaki ta pone anualmente alrededor di 10 mion euro disponibel. Ku e plaka e gastunan ku mayornan ta paga pa akohida, por baha konsiderablemente i ta bin mas espasio pa formashon i rekapasitashon di trahadónan den akohida di mucha.
Na e momentu akí akohida riba e islanan ta relativamente karu. Un parti di e mayornan no por paga e gastunan di pasadia òf akohida pafó di skol. Entrante 2022 lo organisá akohida di mucha na Hulanda Karibense di tal forma ku esaki ta aksesibel pa tur mucha. En bista di e pobresa, e problemanan sosioekonómiko i e problemátika di idioma na Hulanda Karibense, ta ofresé e ora ei edukashon pre eskolar na tur mucha te 4 aña ku ta bai akohida di mucha. Tambe lo mehorá kalidat di akohida despues di skol pa muchanan den enseñansa primario (te mas òf ménos 12 aña).
E kontribushon di mayor ta baha konsiderablemente pa mayoria mayor na Hulanda Karibense. Mayornan ku un entrada abou te risibí kompensashon èkstra, di manera ku akohida di mucha ta bira aksesibel pa nan tambe. Den kuadro di maneho lokal di pobresa e entidatnan públiko tin ademas e posibilidat pa kompensá e gastunan kompleto pa mayornan ku no por paga kontribushon. Den e periodo benidero ta hasi análisis mas detayá di e struktura di e gastunan di akohida di mucha riba e islanan pa por stipulá e altura eksakto di e kompensashon. Organisashonnan di akohida di mucha mester disponé di un pèrmit di operashon di e entidat públiko pa por bin na remarke pa un kompensashon. Organisashonnan di akohida di mucha ku ta kumpli ku e kondishonnan den e ordenansa insular, ta bin na remarke pa un pèrmit.
Areglo di supsidio temporal
Gabinete kier pa tur mayor por probechá e aña akí kaba di e invershonnan den mihó akohida di mucha. Pa e motibu ei, antisipando riba e situashon nobo, medio 2020 un areglo di supsidio temporal ta drenta na vigor. Organisashonnan di akohida di mucha ku tin un pèrmit, di e forma ei por bin na remarke pa supsidio di Gobièrnu Sentral pa redusí e kontribushon di mayor i pa invertí den kalidat di akohida di mucha. Lo publiká e areglo mas despues e aña aki.