Riba 28 di yüni 2023 Entidat Públiko Boneiru i ministerio di Salubridat, Bienestar i Deporte (VWS) a organisá un anochi di informashon pa direktivanan di sentro di akohida di mucha na Boneiru. A informá nan tokante e Kódigo di Protekshon obligatorio ku entrante 1 di yanüari 2024 lo bai ta na vigor na Hulanda Karibense. Den e kódigo akí tin deskribí kiko ta komprondé bou di violensia doméstiko i maltrato di mucha i kon profeshonalnan por atendé ku señalnan ku ta duna indikashon di esaki. Organisashonnan pa mucha ta obligá di traha segun e kódigo di protekshon akí, e sentronan di akohida di mucha tambe. Kada organisashon mester traha un plan di implementashon. Pa esaki nan por hasi uso di sosten di eksperto i di entrenamentu.
Tambe studiantenan di e estudio di kolaboradó pedagógiko di MBO riba nivel 3 i 4 a haña lès na mei i yüni tokante violensia doméstiko i maltrato di mucha. Nan a siña kon pa rekonosé situashonnan di violensia doméstiko i maltrato di mucha mihó, pa diskutí tokante esaki ku mayornan i huntu pidi ayudo si esei ta nesesario. A klousurá e lèsnan ku un tèst i un sertifikado.
