Entrante promé di yüli 2020, organisashonnan pa akohida di mucha i akohida pafó di skol na Boneiru i Sint Eustatius por bin na remarke pa un supsidio pa baha preis di kosto. E supsidio akí ta un siguiente paso di e programa BES(t) 4 kids pa hasi akohida di mucha mas aksesibel pa mayornan. Ku e supsidio akí un organisashon di akohida di mucha por baha e kontribushon di mayornan i tuma medidanan pa mehorá kalidat di akohida. Intenshon ta pa den 2022 introdusí un areglo finansiero struktural pa akohida di mucha.
E programa BES(t) 4 kids ta dirigí riba mehorashon di kalidat di akohida di mucha i akohida pafó di skol i pa hasi akohida (finansieramente) aksesibel pa tur mucha na Hulanda Karibense. Anualmente a pone alrededor di 10 mion euro disponibel p’esaki. E intenshon ta pa na 2022 akohida di mucha i akohida pafó di skol na Hulanda Karibense ta (finansieramente) aksesibel pa tur mucha te alrededor di 12 aña.
Areglo di supsidio temporal
Organisashonnan di akohida di mucha na Boneiru i Sint Eustatius ku tin un pèrmit di operá a base di e Ordenansa Insular Akohida di Mucha, por bin na remarke pa e supsidio pa baha preis di kosto entrante promé di yüli 2020. Pa organisashonnan di akohida di mucha ku ya a akohé mucha kaba den 2019, ta sufisiente si nan a entregá un petishon pa un pèrmit di operashon asina serka e Entidat Públiko.
Ta ehekutá e areglo di supsidio temporal bou di responsabilidat di Gobièrnu Sentral. Den e konteksto ei ta traha estrecho ku e entidatnan públiko. Organisashonnan di akohida di mucha por entregá un petishon pa supsidio serka ‘Uitvoering van Beleid’ (UVB) i ta haña sosten den esei di e frontoffice ku pa e motibu akí a keda ekipá serka Entidat Públiko.
Boneiru
Organisashonnan di akohida di mucha na Boneiru por entregá un petishon pa supsidio asina ku Konseho Insular aprobá e Ordenansa Insular Akohida di Mucha. Si esaki sosodé promé ku promé di yüli 2020, organisashonnan di akohida di mucha por pidi supsidio promé ku promé di ougùstùs pa e di tres kuartal di 2020.
Na Boneiru e supsidio pa baha preis di kosto ta 200 dòler pa luna pa mucha pa pasadia i 150 dòler pa mucha pa luna pa akohida pafó di skol. Organisashonnan di akohida di mucha na Boneiru ku ta risibí supsidio, por pidi un kontribushon di mayor di maksimal 200 dòler pa luna pa pasadia i akohida pafó di skol. E organisashonnan di akohida di mucha akí e ora ei mester pidi un kontribushon di mayor di 150 dòler minimal pa luna pa pasadia i 100 dòler pa luna pa akohida despues di skol. Esaki ta pa garantisá ku ta usa e supsidio pa organisashonnan di akohida di mucha tambe pa mehorá kalidat di akohida di mucha. E kriterio di kontribushon minimal di mayor no ta konta pa organisashonnan ku ya ta risibí un (otro) supsidio di e Entidat Públiko. Mayornan ku no por paga e kontribushon minimal di mayor, por pidi un supsidio pa kupo pa mucha.
Sint Eustatius
Organisashonnan di akohida di mucha na Sint Eustatius ku ya a entregá un petishon pa un pèrmit di operashon serka e entidat públiko, desde awe, den konsulta ku e frontoffice, por entregá un petishon pa supsidio. E montantenan di supsidio na Sint Eustatius ta varia di 80 dòler pa yu pa luna pa pasadia te 200 dòler pa yu pa luna pa akohida pafó di skol. Mayornan ku no por paga e kontribushon di mayor, por pidi un supsidio pa kupo pa mucha serka Entidat Públiko.
Saba
E supsidio pa baha preis di kosto no ta aplikabel den 2020 pa organisashonnan di akohida di mucha establesé na Saba. Na Saba e gastunan di akohida di mucha pa mayornan ya ta mas abou kaba ku e kontribushon minimal di mayor den e areglo di supsidio. Ku e finansiamentu a base di BES(t) 4 kids, Entidat Públiko Saba (OLS) ta invertí den mehorashon di kalidat i siguridat di fasilidatnan di akohida di mucha. Ademas OLS ta sostené mayornan ku un entrada abou. Mayornan ku no por paga e kontribushon di mayor, por pidi OLS un supsidio pa kupo pa mucha.
Mas informashon ta disponibel riba www.best4kids.nu i www.uitvoeringvanbeleidszw.nl