Akohida di mucha

Gobièrnu sentral huntu ku e entidatnan públiko Boneiru, Sint Eustatius i Saba a formulá un konsepto di Ordenansa Insular Akohida di mucha. Kolegio Ehekutivo di Boneiru a presentá e konsepto di ordenansa insular na Konseho Insular. Konseho Insular a aprobá e ordenansa insular riba 7 di yüli 2020.

Download e konsepto di Ordenansa insular Akohida di mucha Boneiru (na Hulandes)

For di e momentu ku e Ordenansa Insular a drenta na vigor, tur organisashon di akohida mester tin un pèrmit di eksplotashon. E eksigensianan di kalidat ku e organisashonnan di akohida mester kumpli kuné ta trata entre otro e plan di maneho pedagógiko, nivel di edukashon, e asina yamá ‘stamgroepen’ den e sentronan di akohida di mucha i e kantidat di trahadó profeshonal ku ta apliká pa ‘stamgroep’. E alohamentu tambe mester kumpli ku e eksigensianan básiko di seguridat i salubridat.

Download e foyeto Eksigensianan di kalidat Akohida di mucha

Organisashonnan nobo i eksistente pa akohida di mucha i fasilidatnan di akohida pafó di skol tin mester di un pèrmit di eksplotashon. Pa organisashonnan eksistente a stipulá un periodo di transishon: nan por haña un dispensashon temporal. Organisashon nobo mester kumpli ku tur eksigensia di kalidat di biaha.

E petishon pa pèrmit na Boneiru ta kana via OLB i mester entregá esaki por eskrito serka Kolegio Ehekutivo. E petishon ta kontené en todo kaso:

• Kopia di pèrmit di establesimentu
• Si ta un kompania di un persona (eenmanszaak): nòmber, adrès, number di telefòn, komprobante di inskripshon na Kámara di Komersio no mas ku 3 luna bieu
• Si ta un persona hurídiko: nòmber-, adrès-, fecha di nasementu di miembronan di direktiva/gerensia, kopia di statutonan, komprobante di inskripshon na Kámara di Komersio no mas ku tres luna bieu i, si ta aplikabel, kopia di registro di akshon
• Komprobante di inskripshon di petishonario i kolaboradónan den registro sivil i kopia di e título di estadia i/òf pèrmit di estadia
• Un deklarashon tokante kondukta (VOG) di petishonario i profeshonalnan no mas ku dos luna bieu
• Máksimo kantidat di mucha i edat pa kada parti di dia
• Máksimo kantidat di profeshonal pa kada parti di dia
• Orarionan ku ta habri i sera
• E adrès (ku tin intenshon di bai usa)
• Plan di maneho pedagógiko di e sentro di mucha
• Plan den fase violensia doméstiko sentro di mucha
• Maneho di siguridat i salubridat sentro di mucha
• Un mapa
• Komprobante di pago di léges

E prosedura di petishon ta dura masomenos dos luna for di e momentu ku tur dokumento relevante ta entregá. Den kaso ku e petishon no ta kumpli ku tur kondishon, e petishonario ta risibí 4 siman pa resolvé e asuntunan pendiente.

Na momentu ku e petishon ta kompleto e prosedura por start. E petishonario ta risibí un konfirmashon por eskrito ku informashon tokante e siguiente pasonan. Den kaso ku e petishon ta kompleto, Kolegio Ehekutivo ta pidi un konseho di e komishon di kalidat di akohida di mucha denter di dos siman.

E komishon di kalidat di akohida di mucha ta duna Kolegio Ehekutivo un konseho denter di 4 siman. E Kolegio Ehekutivo lo tuma un desishon e ora denter di dos siman. Por ekstendé e término aki ku un máksimo di dos siman.

Organisashon pa akohida di mucha i akohida despues di skol na Boneiru por bin na remarke pa un supsidio (promé di 1 yüli 2021) pa baha preis di kosto. Ku e supsidio un organisashon di akohida di mucha por baha e kontribushon di mayor pa mayornan i tuma medidanan pa mehorá kalidat di e akohida.
Organisashonnan di akohida di mucha por entregá un petishon pa supsidio serka ‘Uitvoering van Beleid’ (UVB). Nan ta risibí sosten den esei di parti di e ‘frontoffice’ ku a instituí pa esaki na OLB.

Altura di e supsidio pa baha preis di kosto (entrante promé di 1 yanuari 2025)
Pa tur organisashon di akohida di mucha na Boneiru e supsidio pa baha preis di kosto ta suma maksimal $ 912,- pa mucha pa luna pa akohida di mucha i maksimal $ 515,- pa mucha pa luna pa akohida despues di skol.

Pa ‘gastouder’ na Boneiru e supsidio pa baha preis di kosto ta suma maksimal $ 912,- pa mucha pa luna pa pa akohida di mucha i $ 515,- pa mucha pa luna pa akohida despues di skol.

Altura di e kontribushon di mayor
Si bo organisashon ta risibí e supsidio pa baha preis di kosto, tin un kontribushon di mayor máksimo i mínimo na vigor:

• E kontribushon di mayor pa akohida di mucha i akohida despues di skol no mag ta mas haltu ku $ 100,- pa luna.
• E kontribushon di mayor no mag ta mas abou ku $ 75,- pa luna pa akohida di mucha i $ 40,- pa luna pa akohida despues di skol.
• Pa ‘gastouder’ ku ta ofresé akohida di mucha, e kontribushon di mayor ta $ 75,- pa luna. Pa ‘gastouder’ ku ta ofresé akohida despues di skol, e kontribushon di mayor ta $ 100,- pa luna.

Algun organisashon di akohida di mucha ku ya tin un relashon di supsidio ku OLB por kobra un kontribushon di mayor mas abou ku pèrmit di OLB.

Mayornan ku no por paga e kontribushon di mayor, por pidi un supsidio pa un lugá na e akohida na OLB.

Mas informashon?

• E areglo di supsidio temporal bo ta haña akí: Tijdelijke Subsidieregeling (Nederlands)
• Kambionan promé di 1 yanuari 2025: wijzigingen Tijdelijke Subsidieregeling (Nederlands)

Supervishon riba kalidat di akohida di mucha i akohida pafó di skol ta tarea di Inspekshon di Enseñansa. Inspekshon por laga un inspektor lokal ehekutá parti di e supervishon . Inspektornan por pasa na e sentronan di akohida di mucha ku òf sin aviso previo. Unda ta nesesario nan ta duna konseho na e organisashon di akohida.

Ora tin puntonan di mehorashon inspekshon lo bishitá e organisashon atrobe denter di e tempu palabrá pa wak si a ehekutá e puntonan di mehorashon. Ora tin puntonan serio, inspekshon por duna un konseho negativo. Un konseho negativo por kondusí na medidanan òf siere (temporal).