Entrante 17 di mei, 6 organisashon di akohida di mucha na Boneiru ta kuminsá un proyekto piloto pa mucha ku nesesidat di kuido i edukashon spesial. Esaki ta tuma lugá den kooperashon ku Sentro pa Hubentut i Famia. E organisashonnan di akohida di mucha, durante un aña, ta bai duna akohida tambe na muchanan ku tin mester di apoyo òf atenshon èkstra. E organisashonnan di akohida i mayornan ta risibí apoyo di parti di un tim di kuido multidisiplinario.
Te na e momentunan aki no tabatin ainda un akohida di mucha spesial pa muchanan ku un nesesidat di kuido i edukashon spesial. Tampoko organisashonnan di akohida di mucha no por akudí ningun kaminda pa ku problemanan relashoná ku akohida di muchanan ku nesesidat spesial, pa guia profeshonal, konseho i apoyo. Den esei awor ta bin un kambio.
Basá riba e programa BES(t) 4 kids ta duna e organisashonnan di akohida di mucha e oportunidat pa akohé i guia muchanan ku un nesesidat spesial den nan propio organisashon. Kuater organisashon di mucha ta start entrante 17 di mei, dos den ougùstùs. Nan ta risibí un supsidio inisial i un kontribushon mensual pa kada mucha. E supsidio inisial ta pa hasi adaptashon den struktura di e lugá di akohida. E kontribushon mensual ta pa material i guia èkstra ku tin mester pa apoyá desaroyo di muchanan ku nesesidat di kuido i edukashon spesial. Banda di esei un tim di kuido multidisiplinario bou di guia di Sentro di Hubentut i Famia, ta ofresé sosten profeshonal na e organisashonnan di akohida di mucha i mayornan. E tim di kuido akí ta konsistí di médiko- i enfermeronan di e ofisina di konsulta, un ortopedista, coach- pedagógiko, coach- di famia, guia- di famia, sostenedónan edukativo i e koordinadó riba tereno di akohida di mucha. Kaminda ta nesesario ta buska ayudo di otro spesialistanan, por ehèmpel di EOZ, MHC òf dòkter di mucha.
E proyekto piloto ta dirigí partikularmente riba muchanan outista di 1 te 12 aña. For di investigashon ta resultá ku mas di 50 porshento di muchanan ku nesesidat spesial ku ta konosí na Boneiru, tin un problema di kondukta ku ta relashoná ku outismo. Banda di esei tin hopi mucha ku tin un problema sosial pedagógiko, por ehèmpel debí na insufisiente stimulashon òf problema pa forma relashonnan sosial.
Den e periodo di prueba di un aña ta wak partikularmente kon ta alsa nivel di e akohida di mucha regular pa akohida di mucha kaminda akohida di kalidat pa muchanan ku nesesidat spesial por tuma lugá tambe, ku guia i sosten di parti di e tim di kuido disiplinario. Den esei ta enfoká tambe riba entrenamentu i guia di mayornan di e muchanan aki.
Ademas ta wak kon e kadena di kuido por reakshoná rápido i ku sufisiente suministro riba e nesesidat di kuido di e muchanan. Un bon kolaborashon entre e tim di kuido multidisiplinario ku ta ofresé kuido primario i kuido sekundario i di terser liña di parti di organisashonnan manera EOZ, MHC i Jeugdzorg, ta di gran importansia den esei.
