E promé enkuentro di Red Pedagógiko Boneiru a tuma lugá 20 di ougùstùs. Direktornan i miembronan di direktiva di krèsh, akohida despues di skol i enseñansa di fundeshi tabata bon representá, meskos ku e kolaboradónan di maneho di diferente servisionan di OLB i OCW. Pa medio di e Red Pedagógiko, e programa BES(t) 4 kids ke yega na un bon kolaborashon i realisá akuerdonan ku partnernan den sektor di krèsh i edukashon, ku meta pa mehorá kalidat.
Lei di krèsh pa BES den preparashon
Durante di e enkuentro a pone énfasis prinsipalmente riba trayekto pa yega na un Lei pa akohida di mucha na BES i konsekuensianan di e lei nobo aki pa tur entidatnan konserní. Loke ta sumamente importante ta, ku ta traha for di un vishon pedagógiko i ku krèsh i skolnan ta traha bon ku otro. Bou di guia di UNICEF a realisá un gran parti di e trabou preparativo pa asina yega na un vishon pedagógiko general pa kada un isla. Kulminashon di e trayekto por tuma lugá pronto dor di aliñá e vishon pedagógiko aki ku esun di edukashon i e diferente plannan di maneho. Un konsulta digital ta zona den e kaso aki komo algu lógiko, sigui pa un seshon den kua e konsepto final lo keda formulá i presentá na gobièrnu.
Kolaborashon entre krèsh i skolnan
Den e lei nobo tambe ta stipulá eksigensianan riba aria di desaroyo i trayekto di edukashon, supervishon di muchanan i un transishon agradabel di krèsh pa skol básiko. Esaki ta rekerí un kolaborashon estrecho entre krèshnan i skolnan. Den e kuadro aki lo mester traha ku un programa pa edukashon pre eskolar (vve). Na Boneiru, krèshnan a opta pa programa Kaleidoscoop, kua ya a ser introdusí den un eskala limitá. Enseñansa tambe a indiká di ta positivo pa ku e introdukshon di Kaleidoscoop den grupo 1 i 2.
E trayekto di edukashon pa e programa ta ser realisá pa SHiF, ken tin e lisensia pa e programa na Boneiru. Na e momentu aki ta formando 10 guia pa por organisá edukashon i guia den práktika.
Supervisá traspaso pa skol
Pa laga e traspaso di krèsh pa skol kana bon, mester mónitòr e muchanan den nan desaroyo. Pa e forma aki nan por haña aktividatnan ku ta den konkordansia ku loke nan tin mester na momentu ku esei ta nesesario. P’esei mester di sistemanan di opservashon unánime i formularionan pa traspaso. Ku esakinan, skolnan ku pèrmit di mayornan por ser informá tokante di alumnonan ku ta drenta. Tambe por atendé ku retrasonan den desaroyo for di trempan, ku intervenshonnan korekto òf pa medio di un manda pa un spesialista. Di e forma aki, un struktura di kuido ta ser konstruí.
Kolaborashon skol i akohida despues di skol
Por último, ta boga pa un mihó kolaborashon entre skolnan i akohida despues di skol (BSO). BSO por sostené enseñansa dor di por ehèmpel enfatisá e mesun temanan, organisá èkstra aktividatnan pa ku idioma i pone atenshon na desaroyo di idioma. E desaroyo integral di sentro pa mucha (IKC) por reforsá e proseso di kolaborashon. Ta asina ku un IKC ta disponé di tur e inisiativanan pa konhuntamente por realisá un vishon pedagógiko i establesé akuerdonan entre akohida despues di skol i skol.
Mirando e gran partisipashon i reakshon di partisipantenan, ta kla ku tin un nesesidat pa un siguiente enkuentro di e Red Pedagógiko.